|
Donostiako Udalak Baiona-Donostia Eurohirian parte hartu nahi du
Donostiako Plan Estrategikoko Batzorde Betearazleak Donostia Euskal Eurohirira batzeko eskariaren alde egin du. Gipuzkoako Foru Aldundiari eta Baiona-Donostia Eurohiria kudeatzen duen Garapenerako Mugaz Gaindiko Agentziari Donostiako Udalak Eurohirira batzeko aurkeztu duen eskaria tramita dezaten eskatu du. Donostiako Udalarentzat Eurohirira batzea mugaz gaindiko harremanak sustatzeko lehentasuna da.
PSE-EE alderdiak ere egin ditu adierazpenak Donostiako Udalak hartu duen erabakiaren harira. Susana Garcia Chuecaren ustez, Donostiako Udalak ordezkaritza eta parte hartze zuzena izan behar du Baiona-Donostia Eurohirian, dagozkion eskubide eta betebeharrekin. Chuecak esan duenez, Eurohiriaren xedeak betetzeko ezinbestekoa da Donostiako eta Baionako udalek proiektuarekin bat egitea eta protagonistak izatea. BERRIA
 |