Talent Housen hasi dute bisita, eta Kortak, Olaizolak eta Coletok aurkezpen bana egin diete, ordezkatzen dituzten erakunde eta enpresek garatutako proiektuak eta estrategiak azaltzeko. Kortak, bere aldetik, 2021aren amaieran kaleratutako 2030 Plan Estrategikoa eta honen erronka nagusiak aurkeztu ditu, hala nola, erronka demografikoa edo ingurumenari lotutakoa, eta horiek hiriaren eredu aldaketan izan duten eraginaren berri eman du, tartean, mugikortasun jasangarriago bat lortzeko helburuarekin. 2000ko hamarkadaz geroztik garatzen ari den Zientzia eta Berrikuntzaren Hiria estrategian ere jarri du fokua: "Garai hartan sortu zen nukleo zientifiko-teknologiko txiki hura, goi-mailako ikerketa zientifikoa egiten duten erakundez eta zentroz osatutako sare trinkoa bihurtu da", azaldu du. Horri esker, gaur egun Donostian dute egoitza, besteak beste, hainbat ikerketa-unibertsitatek, Eusko Jaurlaritzako Hezkuntza Sailaren bikaintasun-zentroak (BERC zentroak), Eusko Jaurlaritzako Lehiakortasun Sailaren ikerketa kooperatiboko zentroak (IKZ zentroak), zenbait teknologia-zentrok eta ikerketako institutu biosanitarioak.
Donostia Sustapenaren kasuan, Hiriaren Berrikuntza eta Eraldaketarako Estrategian jarri du arreta Olaizolak; zentroen, unibertsitateen eta enpresen arteko lankidetza oinarri duen estrategia honen bidez, transferentzia teknologikoarekin, ezagutzaren eta berrikuntzaren sozializazioarekin (WeekINN), tokiko talentuaren garapenarekin (Talentu Berritzailea) eta nazioarteko talentuaren itzulera eta erakarpenarekin lotutako programak eta ekintzak landu dituzte. "Horrez gain, Europako hainbat proiektu gidatu ditugu Smart Cities-en alorrean, eta oinarri teknologikoko ekintzailetza bultzatu dugu", gaineratu du.
Goizeko saioari amaiera emateko, teknologia eta negozio-eredu berrien garapenean egiten duten lanaren berri eman du Coletok. Izan ere, mugikortasunaren etorkizuneko eszenatokia aldatzen laguntzen dute, ingurumenean eragin txikiagoa, seguruagoa, adimentsuagoa eta inklusiboagoa eskainiz. "Testuinguru horretan, gure jarduera mugikortasun-sistemen balio industrialaren katera bideratzen dugu, baita administrazio, mugikortasun-kudeatzaile eta erabiltzaileengana ere", zehaztu du. Uneotan, mugikortasun elektrikoaren, hidrogeno teknologien eta automatizazioaren aldeko apustua egiten ari da Tecnalia, eta Replicate eta Smart Kalea bezalako proiektu aitzindariak garatu dituzte. Gainera, aireko hiri-mugikortasunean lanean ari dira, eta urrats garrantzitsuak egin dituzte azken urteetan.
