Gaur egun 21 auzo ditu Donostiak, "bakoitzaren mugak zehaztea oso zaila den arren", adierazi du Donostiako Udaleko Gizarte Zerbitzuetako, Gizarte Ekintzako eta Auzoetako zinegotzi ordezkari Maria Jesus Idoetak saioaren hasieran. Eva Monentek gidatutako SER kateko Hoy por Hoy San Sebastián saioan izan dira berarekin RAZ bulegoaren sortzaileetako bat eta Donostiako Arkitektura Eskolako irakasle elkartua den Ander Gortazar Balerdi eta Bidebietako Auzo Elkarteko eta hiriko Ekialdeko Barrutiko Batzarreko kide Jon Tamayo.
Idoetak azaldu duenez, auzoen bilakaera askotarikoa izan da, baina "guztiek bilakaera positiboa" izan dutela azpimarratu du, Udalaren inbertsioari esker: 2024an 67 milioi euro inbertitu ziren auzoetan; horietatik 44 milioi jarduera zehatzei dagozkie, eta gainerako 23 milioiak hiri osoan egiten diren lanei lotutakoak dira: asfaltatze-lanak, inausketa, haur-parkeak berritzea, etab. "Auzoak pertsonek egiten dituzte, eta, horregatik, ezinbestekoa da hirigintza-proiektuak sustatzeaz gain, gizarte-proiektuak ere bultzatzea", hala nola, Erlauntza edo Ongi Etorri Ikastolara proiektuak, adinekoen edota adingabe migranteen integrazioa errazteko helburua dutenak.
Gortazarrek, bere aldetik, ehun ekonomikoaren garapenak sortutako onuretan jarri du arreta, legeek espazio publikoaren erabilerari buruz ezarritako oinarrietatik haratago: "Merkataritza eta ostalaritzaz gain, onuragarria da negozioak, bulegoak... kalean bertan egotea, errealitatearekin harreman zuzenean eta poligonoetatik kanpo". Eta 15 minutuko hiriari lotutako topofiliaren kontzeptua azaldu du, pertsonaren eta bizi den lekuaren arteko loturari erreferentzia egiten diona: "Beste alderdi batzuetan zentratzen garen arren, oso garrantzitsua da nork bere auzoa gustuko izatea, polita iruditzea eta bertan bizi nahi izatea".
Tamayoren aburuz, bestalde, auzoek aukerak eskaini behar dituzte: "Auzo guztiak ez dira berdinak, eta Auzo Elkarteak gara herritarren eskaerak Udalari helarazteaz arduratzen garen bitartekariak". Nahiz eta batzuetan parte-hartzea nahi baino txikiagoa izan, Bidebieta auzoa "zoragarria" dela eta hobekuntzak egiten ari direla nabarmendu du, besteak beste, partaidetza-prozesu baten bidez diseinatutako parke berria edo udaberrian abiatu nahi duten bigarren eskuko eta tokiko produktuen azoka txikia.
Programa osoa entzungai duzue esteka honetan.
