Idoia Mendia lehendakariordeak ere hiriburutzaren arrakasta azpimarratuz abiatu du saioa: "Gaurkoan, amaiera emango diogu Nazio Batuen Erakundearen ebazpenarekin bat egin duen hiriburutzari; Europarekin lerrokatuta sentitu den, etorkizunari begiratu dion eta gazten babesa izan duen hiriburutzari". Eider Mendoza ahaldun nagusiak eta Eneko Goia Donostiako alkateak ere bat egin dute mezuarekin, Gizarte Ekonomiako familiek emandako babesa eskertuz, eta arlo honetan lanean jarraitzeko konpromisoa hartu dute, eredu tradizionalaren alternatiba hau sustatzeko eta duen balioa gizarteratzeko.
Haiekin batera, Amparo Segovia Lan eta Gizarte Ekonomiako Ministerioko Estatu idazkariak, Juan Antonio Pedreño CEPES Gizarte Ekonomiako Espainiako Enpresarien Konfederazioko presidenteak eta Rosa Lavín KONFEKOOP Euskadiko Kooperatiben Konfederazioko eta EGES Euskal Gizarte Ekonomia Sareko presidenteak hartu dute hitza.
Sorpresaz eta emozioz jositako saioa izan da Laura Chamorrok gidatutakoa, eta besteak beste, ekonomia sozial eta solidarioaren balioekin lotutako sortzaile eta artista gazteek umore, musika eta arte ukituak eman dizkiote ekitaldiari.
Irabazleak
Gizarte ekonomiaren balioak zabaltzea eta gazteei helaraztea izan du helburu jaialdiak, horretarako, pieza grafikoak eta ikus-entzunezkoak sortuta. Parte-hartzaileak bi kategoriatan lehiatu dira: ikasleen kategoria, DBHko 4. mailako, Lanbide Heziketako eta Unibertsitateko ikasleentzat; eta publikoaren kategoria, 18 urtetik gorako diseinu grafikoaren edo ikus-entzunezkoen alorretako profesional eta zaleentzat.
Inklusioa, jasangarritasuna, berdintasuna, elkartasuna eta tokiko garapena izan dira saritutako lanen aztergaiak, eta irabazleen zerrenda osoa jaialdiaren webgunean izango da kontsultagai.
