Duela bi urte, Michelin Izarrak dituzten Gipuzkoako sukaldarien artean % 70, 70 urtetik gorakoak ziren. Gaur egun, kopurua % 27ra jaitsi da.
Hiriko Gizarte Kontseiluak antolatutako eta Eva Monentek zuzendutako bilkuran, belaunaldien arteko erreleboa bermatuta dagoela ondorioztatu dute. Subijanarentzat, aldiz, belaunaldi berriek hartuko duten lidergo rola da kezka nagusia, eta Oihanederrek, bere aldetik, gogoa eta motibazioa ez ezik, beste baldintza mesedegarri batzuk ere behar direla nabarmendu du, gaur egun lortzen zailak direnak. Martinezen ustez, eszenatokiak sortzea eta bitartekoak jartzea da gakoa, “duela 40 urte Realak Liga irabazi ondoren Zubieta martxan jarri zuen bezala, garai berean nabarmendu zen euskal sukaldaritzak ere hazten jarraitzeko aukera izan dezan”.
Eta horretan ari dira BCCn, Michelin Izarrak dituzten jatetxeez gain, arriskatu eta esperientzia gastronomiko desberdinak proposatzen dituzten sukaldari asko ditugula sinetsita baitaude.
Sektore honetan lanean ari diren emakumezkoen kopurua txikiagoa da, eta horren atzean dagoen arrazoi nagusia lana eta familia kontziliatzeko ezintasuna dela uste dute. Oihanederren hitzetan, dena den, lehentasunak ezartzea eta familia-antolaketa egokitzea ezinbestekoa da: "Goi-mailako emakumezko sukaldari asko daude, baina ikusgarritasun gutxi ematen zaie. Baina kontuan izan behar dugu duela belaunaldi batzuetako errealitatetik gatozela, eta egun baino askoz emakumezko gutxiago ginela ostalaritza-eskolan», gogoratu du. Gaur egun, zifrak aldatu egin dira: ostalaritzako langileen % 52 emakumeak dira, eta BCCko ikasleen artean, % 40.
Hain zuzen ere, zentroaren zuzendari nagusiak azpimarratu du unibertsitate gastronomikoek prestigioa eta aintzatespena eman diotela sektoreari: "Mundu osoko talentu gaztea erakartzen dute eta hiria kokatzen laguntzen dute". Subijanarentzat, BCC bezalako zentro batez gain, ostalaritza-eskolak behar dira, maila desberdinetako prestakuntza eskaintzeko.
Etorkizuneko erronkei buruz galdetuta, Akelarreko sortzaileak jarreraren garrantzia azpimarratu du: "Negar gutxiago egin behar da, zailtasunak gainditu eta aurrera egin”. Oihanederren ustez, ilusioa ezinbestekoa da, eta ametsak bete daitezen lan egin behar da. Aizegak, bere aldetik, sukaldaritzan arriskatzen duten, herrikoia denarekin konformatzen ez diren eta bidea irekitzen duten sukaldariengan jarri du fokua: "Gutxiengoa dira, baina funtsezkoak. Eta gainerakoek kalitatezko proposamen bat eskaini eta komunitatea sortu behar dute”.
Eztabaida Gizarte Kontseiluko kide Martinezekin amaitu da, eta gogorarazi du gazteei tresnak eskaini behar zaizkiela prestatu ahal izateko eta sektorera sartzeko: "Azpiegiturak, kalitatea, publikoa… baditugu jada. Erakundeetatik oztopo gutxiago eta laguntza gehiago eskainiko balituzte, Donostia gastronomiaren MIT bilakatu liteke".
Eztabaida esteka honetan entzun dezakezue.
