Azken bi urteetan, Gizarte Kontseiluaren jarduera-egutegia ere pandemiak eragindako errealitatera egokitu behar izan da. Hau da, 2020an antolatutako hitzaldiak modu digitalean egin ziren, eta pandemia bera izan zuten hizketagai, Madrilgo Carlos III.a Osasun Institutuko Jose Alcamí birologoaren eskutik (bideoak esteka hauetan daude eskuragarri: 1. saioa eta 2. saioa). 2022ko martxoan, halaber, hiriek klima-aldaketaren aurrean egokitzeko duten gaitasunaren inguruko hitzaldia eskaini zuen Basque Centre for Climate Change erakundeko zuzendari zientifiko Maria José Sanzek (bideoa ikusgai, hemen); hau ere, online.
Egoerak hobera egin duela ikusita, aurrez aurreko hitzaldi eta mahai-inguruak berreskuratuko ditu orain Gizarte Kontseiluak, eta lehen saiorako aukeratutako gaia, organoaren lehentasunezko lan-ildoetako bat izan da: adineko pertsonak eta haiei lotutako alderdi guztiak. Eta horien artean, hain zuzen, osasuna da garrantzitsuenetako bat.
Kasu honetan, gaixotasunen eta guztiok jasaten dugun endekapen-prozesu etengabearen ikuspegitik landu beharrean gaia, medikuntzaren aurrerapen handietan eta ohitura-aldaketetan jarriko da fokua, gure bizitza luzatzen eta/edo bizi-kalitate hobea eskaintzen lagundu baitigute. Hain zuzen ere, bizi-itxaropena luzarazi duten faktore nagusiak bi alderdiri lotuta daude: bizi-baldintzen hobekuntzari eta aurrerapen mediko eta teknologikoei.
Topaketa
Gai horien guztien inguruan eztabaidatzeko, Zenbat biziko gara? Gure bizitza hobetu duten medikuntzaren aurrerapenak saioa antolatu du Gizarte Kontseiluak urriaren 18an, 18:00etan, Tabakalerako Z aretoan. Bertan izango dira Pilar Lekuona, Gipuzkoako Erizainen Elkargo Ofizialeko presidentea eta Gizarte Kontseiluko presidenteordea; Julio Arrizabalaga, Barne Medikuntzan eta Gaixotasun Infekziosoetan aditua eta Biodonostiako zuzendari zientifiko ohia; eta Itziar Vergara, Biodonostia Institutuko Lehen Mailako Atentzioko taldearen arduraduna eta familia-medikua.
Eneko Goia Donostiako alkateak zabalduko du solasaldia, eta Daniel Zulaika Gizarte Kontseiluko presidenteak egingo du topaketaren aurkezpena. Eztabaida gidatzeaz arduratuko da, ostera, Maialen Goñi Gizarte Kontseiluko komunikazio arduraduna.
Topaketara joan ahal izateko, leku muga dela eta, LOTURA HONETAN bidez aldez aurretik izena ematea gomendatzen da (hala egiten ez dutenek ez dute lekua bermatuta izango).
