Eva Monente programaren gidariaren galerari erantzunez, epaimahaiak hiru alor nagusi aztertu zituela azaldu du Kontseiluaren presidente Daniel Zulaikak: originaltasuna, proiektuaren iraupena eta erabilgarritasuna. “Ez dugu ahaztu behar Gizarte Kontseilua udalaren eta herritarren arteko elkarrizketarako gunea dela, eta oso garrantzitsua iruditu zitzaigun elkarte horien guztien lana aitortzea, aurrera egitera animatzeko modu bat delako eta beste pertsona eta erakunde batzuek beren proiektu propioak garatu ditzaten”.
Gipuzkoako Gizarte Langintzaren Elkargo Ofizialak zaurgarritasun egoeran dauden gazte migratzaileei babesa ematen dien Herritarren Harrera Sarea aurkeztu zuen deialdira, eta hain zuzen, garaile suertatu zen proiektua. Garazi Montuschi bozeramaileak kontatu duenez, egiten duten lana “oso gogorra da,gurera etortzen gazteak muturreko egoeretan egoten direlako eta oso kalteberak direlako”. Sareak prestakuntza-zentroekin, beste kolektibo sozial batzuekin eta hainbat erakunderekin elkarlanean egiten du lan, baina egoerak okerrera egin duela azpimarratu du Montuschik: “Gazte horietako batzuek lana aurkitzen dutenean, erregularizatzen direnean edo gizarte-laguntzak eskuratzen dituztela ikusten dugunean, asko pozten gara. Baina, oro har, lehen baino askoz okerrago daude, gero eta gehiago direlako osasun arazo larriekin edo oso egoera prekarioetan kalean dauden pertsonak”.
Helduen Hitza elkarteak sustatutako San Telmo Museoko +55 Kultur Giden Boluntariotza Programak, bere aldetik, lehen proiektu finalistaren diploma jaso zuen. Juan Mari Perez bozeramaileak azaldu duenez, gaur egun proiektuan lanean ari diren sei gidak Marisol Aristik prestatu zituen, 2012ra arte bera arduratu baitzen gida lanak egiteaz. Gaur egun, astean bi bisita antolatzen dituzte astearteetan (museora doan sartzeko eguna), bata goizez eta bestea arratsaldez. Museoa sei zatitan banatu dute, lau historiari dagozkio eta bi arteari, eta ordu eta erdiko bisita bakoitzean guneetako bat azaltzen diete bisitariei, xehetasun handiz. “Etortzen direnek hiriaren eta bertako jendearen historia ondo ezagutzen dute, gure arbasoak nola bizi ziren gogorarazten diguten jai asko ditugulako; baina bisitari askok esan digute bisita gidatuari esker museoa sakon ezagutu ahal izan dutela”, adierazi du Perezek. Bisita egin ahal izateko ezinbestekoa da aldez aurretik izena ematea, plazak mugatuak baitira.
Bukatzeko, Gipuzkoa Ostalaritza elkartearekin eta Grupo CEIrekin elkarlanean abian jarri zuten proiektuaren berri eman du Denys Makyeyev GROMADA ukrainiarren elkarteko presidenteak. Ukrainaren inbasioa hasi eta egun gutxira jarri zuten martxan ekimena, gerrako errefuxiatuak ostalaritza-sektorean integratzeko, eta proiektuak bigarren finalistaren diploma jaso zuen Gizarte Kontseiluaren deialdian. Makyeyevek azaldu duenez, helburu nagusia errefuxiatuak etxean edo harrera-etxeetan ez ixtea izan zen, beren sorterrian gertatzen ari zenaz pentsatzeari utzi ziezaioten. “Ostalaritza-sektorea nahiko irisgarria da, eta, beraz, unean uneko dirulaguntzak eskaini beharrean, pertsona horiek lan- eta gizarte-esparruan txertatzeko modua bilatzen saiatu ginen”. Orain arte, 10 eta 15 kide arteko hiru talde osatu ahal izan dituzte, eta horietatik 11k lanean jarraitzen dute eta beste batzuk lan-poltsetan sartu dira. “Oso harro nago nire herrikideez. Eta orain arte proiektua ezagutu ez duten errefuxiatuak animatzen ditugu bertan izena ematera”.
Saio osoa ESTEKA honetan duzue entzungai 15.50 minututik aurrera.
