Zientzia eta berrikuntza

Donostia hiri gisa bere estrategia prestatzeko prozesuan murgilduta dago, datozen urteetan aurre egin beharko dien erronkei heltzeko. Erronka horiek hainbat joeren eskutik datoz, hala nola klima-aldaketaren mehatxua, gizarte-dinamikak, eta horien artean biztanleriaren zahartzea, immigrazioa, turismoa edo gure egunerokoan energia, komunikazioak edo osasun-sareak bezalako azpiegitura kritikoek eskaintzen dituzten zerbitzuen mendekotasun gero eta handiagotik.

Biztanleriaren zahartzea agerikoa da gure hirian. Gaur Donostian biztanleriaren %24ak, 65 urte baino gehiago ditu eta Eustaten proiekzioen arabera %27a gaindituko du 2030ean; urte horretan, Donostiako biztanleriaren %50ak 50 urte baino gehiago izango ditu.

Donostiak lotura berezia du kulturarekin, eta bere kultur eskaintzaren aniztasuna eta kalitatea ez da oso ohikoa bere tamainako hiri batentzat. Musika Hamabostaldia, Zinemaldia edo Jazzaldia bezalako jaialdi historikoak, donostiarren bizitza kulturala tradizioz markatzen dutenak, hainbat une historikoren zein hiriak kulturaren bidez jarrera estrategikoak hartzeko hartutako erabakiaren emaitza dira, 2016ko Europako Kultur Hiriburutzaren kasuan bezala. Hau da, Donostiak kultura hiri-estrategiaren elementu gisa erabiltzeko eta erronka berriei aurre egiteko ohitura badu. Donostiak kulturaren eta sorkuntzaren bidez hiri bezala kokatze egokia lortzeko duen apustu horretan, Tabakalera dago zalantzarik gabe.

Donostia, nanozientzia eta nanotekonologiaren puntako ikerketa ere bada. Ez da kasualitatea. Etorkizuneko apustu ausartari erantzuten dion errealitatea da eta denboran zehar mantendu beharrekoa. Gure gizarteak, bere instituzioen bitartez, argi eduki du Euskadiren garapena berrikuntzaren eskutik joan behar dela eta bide hori jarraitzearen alde egin du zalantzarik gabe. Donostia, hiru unibertsitate-campusekin, ikerkuntza zentro ugariekin eta teknologia oinarri duten enpresen mintegia den parke teknologiko batekin, nazioartean zientzia, teknologia eta berrikuntzaren hiri bezala nabarmentzeko potentzial izugarria du.